လၢတၢ်ခးသံကညီပၢၢ်ဆၢတၢ်သုးဖိဖဲမၠၣ်ဝတံၣ်ဝ့ၢ်ပူၤအံၤဒုးထိၣ်ဟူးထိၣ်ဂဲၤဝဲပှၤအသးဘၣ်ဃးဒီးတၢ်ဘံၣ်တၢ်ဘၢအတၢ်အိၣ်ဖျါလၢကီၢ်ပယီၤကီၢ်ဆၢဝ့ၢ်ခၢၣ်သးအပူၤ,ဒုးအါထီၣ်စ့ၢ်ကီးဝဲတၢ်ပျံၤတၢ်ဖုးဒီးတၢ်ဖ့ၣ်ဆၢအံၤဒုးဒိၣ်ထီၣ်အါထီၣ်ဝဲတၢ်ဘၣ် ဂံာ်ဂူာ်သ့ဝဲဒၣ်စ့ၢ်ကီးန့ၣ်လီၤ.
လၢတၢ်ကတိၤသကိးတၢ်ဒီးအ့ၣ်ယၣ်ဝဒံၣ်တၢ်ကစီၣ်ဖဲမုၢ်ဖီဖးအနံၤလၢမၠၣ်ဝတံၣ်ဝ့ၢ်န့ၣ်,တၢ်ဂ့ၢ်တၢ်ကျိၤနီၢ်နီၢ်လၢကီၢ်ပယီၤပဒိၣ်ဒီးကညီပှၤဖီၣ်စုကဝဲၤကရူၢ်ခံခီယၢ်ပၤပာ်ဖျါထီၣ်တ့ၢ်ဝဲဒၣ်,(DKBA)အပှၤတဂၤဘၣ်တၢ်ခးသံအီၤဒီးတဂၤဘၣ်ဒိဝဲဒၣ် ဖဲလၢတၢ်ဖ့ၣ်ဆၢလိာ်သးကဲထီၣ်ဝဲဒၣ်အဆၢကတီၢ်ဖဲမုၢ်လ့ၤဧိၤမုၢ်နၤခီလၢမၠၣ်ဝတံၣ်ဝ့ၢ်န့ၣ်လီၤ.
တၢ်သူၣ်ပိၢ်သးဝးဒီးတၢ်သူၣ်ပျံၤသးဖုးအါထီၣ်ဝဲလၢဝ့ၢ်အပူၤ,ဒ်န့ၣ်အသိးဖဲနွံဟးထီၣ်အဆိအချ့အံၤတၢ်ထံၣ်န့ၢ်စ့ၢ်ကီးမ့ၢ်ပိၢ်လၢဘၣ်တၢ်တ့န့ၢ်အီၤဒီးတအိၣ်ဒီးတၢ်ဝံာ်သံပၢၤဃာ်အီၤနီတမံၤဘၣ်.
ဒ်လၢတၢ်ကစီၣ်ဂံၢ်ခီၣ်ထံးပာ်ဖျါထီၣ်ဝဲအသိး,ကညီကလုာ်ဒူၣ်အသုးဖိလၢအမ့ၢ်လ့စိနဲၣ်အံၤသံဝဲဒၣ်ဖဲလၢတၢ်ကဲထီးသးအလီၢ်ဒီးမ့မ့ၢ်လၢအဂၤတဂၤန့ၣ်တၢ်ခးဘၣ်ဒိအကိာ်ဘိဒီးခဲအံၤဘၣ်ကူစါယါဘျါအသးလၢတၢ်ဆါဟံၣ်န့ၣ်လီၤ.

ပှၤဘၣ်မူဘၣ်ဒါလၢကညီဒီကလုာ်စၢဖှိၣ်ကရၢ(KNU)တၢ်ဆဲးကျိးအရူလၢအမ့ၢ်ဝဲကလုာ်ဒူၣ်မိၢ်ပှၢ်တဒူၣ်လၢဆီလီၤသးဖဲ မၠၣ်ဝတံၣ်ဝ့ၢ်ပူၤအံၤစံးဝဲဒၣ်လၢတၢ်အဂ့ၢ်ခိၣ်သ့ၣ်လၢဒုးကဲထီၣ်ဝဲတၢ်ဘၣ်ဂံၤဂူာ်တဘျီညါအံၤန့ၣ်မ့ၢ်လၢသံးအဃိန့ၣ်လီၤ.

ပှၤဘၣ်မူဘၣ်ဒါတၢ်ဆဲးကျိးအရူ,သုးခိးဒိၣ်ဖိစီၤရိစံးဝဲဒၣ်လၢ(DKBA)သုးဖိတခီမူၤဒီးဘျၢၣ်ဝဲဒၣ်သိလ့ၣ်လၢကျဲအဖီခိၣ်န့ၣ်လီၤ.တၢ်ဘံၣ်တၢ်ဘၢပှၤဘၣ်မူဘၣ်ဒါလၢအခိးတၢ်ဖဲန့ၣ်ပတုာ်အီၤဒီးမၢဝဲအတၢ်စံၣ်လီၤလၢသိလ့ၣ်အပူၤန့ၣ်လီၤ.ဖဲန့ၣ် ဝံၤအလီၢ်ခံအဝဲဘျၢၣ်ဝဲဒၣ်သိလ့ၣ်လၢအမ့ၢ်ဝဲပှၤဘၣ်မူဘၣ်ဒါအံၤအတၢ်န့ၣ်လီၤ.လၢတၢ်န့ၣ်အဃိပှၤဘၣ်မူဘၣ်ဒါအံၤခးအီၤလၢကျိန့ၣ်လီၤ.
(DKBA)ဒီးကီၢ်ပဒိၣ်အပှၤဘၣ်မူဘၣ်ဒါလၢအိၣ်ဒီးတၢ်စိကမီၤသ့ၣ်တဖၣ်ကထံၣ်လိာ်သးဒ်သိးကဂုာ်ကျဲးစၢးတၢၣ်ပီၣ်သကိးဝဲ,မ့ၢ်လၢတၢ်ဘၣ်ဂံၤဂူာ်ကဲထီၣ်သးအဖီခိၣ်ပှၤလၢအိၣ်ဆိးဝဲဖဲဟီၣ်ကဝီၤသ့ၣ်တဖၣ်န့ၣ်တအိၣ်ဒီးတၢ်သူၣ်မုာ်သးမုာ် ဘၣ်န့ၣ်လီၤ.
စီၤရိစံးစ့ၢ်ကီးဝဲလၢပှၤလၢအိၣ်ဆိးဝဲဖဲတၢ်လီၢ်ဟီၣ်ကဝီၤပူၤသ့ၣ်တဖၣ်ခဲအံၤဘၣ်အိၣ်ဆိးဝဲဒၣ်ဒီးတၢ်ပျံၤတၢ်ဖုးအဂ့ၢ်န့ၣ် လီၤ.အဝဲသ့ၣ်ဘၣ်ကိၢ်ဘၣ်ဂီၤဝဲဒၣ်လၢတၢ်ဘၣ်ဂံာ်ဂူာ်အံၤ,ဒိၣ်ထီၣ်အါထီၣ်သ့ဝဲဒၣ်အဃိန့ၣ်လီၤ.
ကီၢ်ပဒိၣ်တၢ်ဘံၣ်တၢ်ဘၢသုးဖိတဂၤလၢ,တအဲၣ်ဒိးပာ်ဖျါထီၣ်အမံၤတဂၤအံၤစံးဘၣ်ဝဲအံၣ်ရၣ်ဝဒံၣ်လၢတၢ်ကဲထီၣ်သးဝဲအံၤမ့ၢ်ဝဲဖဲမုၢ်ဖီဖးအနံၤတချုးဖးဖီမုၢ်အဆၢကတီၢ်ဒီးဖဲန့ၣ်ဝံၤအလီၢ်(Toyota Hilux Surf)သိၣ်လ့ၣ်လၢဘၣ်တၢ်နီၢ်အီၤ လၢလ့စိနဲၣ်အံၤဘျၢၣ်ဝဲတၢ်ဘံၣ်တၢ်ဘၢသုးဖိတဂၤအံၤအသိလ့ၣ်န့ၣ်လီၤ.
အဝဲစံးဝဲဒၣ်လၢပှၤနီၢ်သိလ့ၣ်တဒိကနၣ်ဝဲဒၣ်တၢ်ကလုၢ်လၢတၢ်မၢအအိၣ်ပတုာ်ဘၣ်,ဒီးလၢတၢ်ခီဂာ်ဝဲတၢ်ဒီသဒၢအတိာ်အလီၢ်န့ၣ်အဝဲလဲၤဘျၢၣ်ဘၣ်ဝဲဒၣ်တၢ်ဘံၣ်တၢ်ဘၢသုးဖိအံၤအသိလ့ၣ်န့ၣ်လီၤ.
အဝဲစံးအါထီၣ်စ့ၢ်ကီးဝဲဒၣ်လၢ,ဖဲလၢတၢ်ဘံၣ်တၢ်ဘၢအပှၤဘၣ်မူဘၣ်ဒါတဂၤအံၤမၢဝဲအတၢ်စံၣ်လီၤလၢသိလ့ၣ်ပူၤအခါ န့ၣ်,အဝဲသ့ၣ်တခီဂုာ်ကျဲးစၢးထုးထီၣ်ဝဲဒၣ်အကျိန့ၣ်လီၤ.လၢတၢ်န့ၣ်အဃိဒ်သိးကပတုာ်ဝဲဒၣ်သုးဖိအံၤအဂီၢ်အဝဲဘၣ် ခးဝဲဒၣ်န့ၣ်လီၤ.
တၢ်ဘံၣ်တၢ်ဘၢတဖုလၢကွၢ်ဆၢၣ်မဲၣ်တ့ၢ်ဒီး(DKBA)သုးဖိခံဂၤအံၤန့ၣ်ဘၣ်တၢ်ပၢအဝဲသ့ၣ်လၢပယီၤခီၣ်ချ့သုးရ့ၣ်(၂၇၅)အသုးဒ့ခိၣ်လၢအိၣ်ဆီလီၤသးဖဲဝ့ၢ်မၠးဝဒံၣ်အပူၤ,ပာ်ဃုာ်ဒီးပၢၤကီၢ်,သုးခီးကီၢ်ဆၢသ့ၣ်တဖၣ်ဒီးဟီၣ်ကဝီၤပှၤလၢအိၣ်ဒီး တၢ်စိကမီၤသ့ၣ်တဖၣ်န့ၣ်လီၤ.
တၢ်ဖ့ၣ်ဆၢကဲထီၣ်သလၢကီၢ်ပဒိၣ်သုးသ့ၣ်တဖၣ်ဒီးကညီဖီၣ်စုကဝဲၤကရူၢ်သ့ၣ်တဖၣ်အဘၢၣ်စၢၤဖဲဝ့ၢ်မၠးဝဒံၣ်အပူၤအံၤ န့ၣ်ဒိၣ်ထီၣ်အါထီၣ်ဝဲဝံၤ,ဖဲန့ၣ်ပိာ်ထွဲထီၣ်အခံဃုာ်ဒီးပယီၤသုးမုၢ်ဒိၣ်ဟ့ၣ်လီၤဝဲတၢ်ကလုၢ်လၢပှၤပၢၢ်ဆၢတၢ်ဖိသ့ၣ်တဖၣ် တဘၣ်ကူကၤသုးအကူအကၤမ့တမ့ၢ်တဘၣ်စိာ်တၢ်စုကဝဲၤလၢဝ့ၢ်အပူၤဘၣ်န့ၣ်လီၤ.