ကညီတၢ်ကရၢကရိတဖၣ်ကမၤဒီကလုာ်တၢ်အိၣ်ဖှိၣ်ဖးဒိၣ်ဘၣ်ထွဲဘၣ်ဃးထံရူၢ်ကီၢ်သဲး,စုကဝဲၤဒီးတၢ်ဃူတၢ်ဖိး

...

ကညီတၢ်ကရၢကရိတဖၣ်ကမၤဒီကလုာ်တၢ်အိၣ်ဖှိၣ်ဖးဒိၣ်ဘၣ်ထွဲဘၣ်ဃးထံရူၢ်ကီၢ်သဲး,စုကဝဲၤဒီးတၢ်ဃူတၢ်ဖိး

Karen News, 22 Apr 2014

URL: http://karennews.org/2014/04/karen-groups-to-hold-national-conference-on-politics-arms-and-unity.html/
ကညီထံရူၢ်ကီၢ်သဲးဒီးပှၤတဝၢတၢ်ကရၢကရိတဖၣ်လၢအကဲဝဲကညီပှၤတဝၢလၢကီၢ်ပယီၤဒီတဘ့ၣ်အခၢၣ်စးအံၤကမၤဝဲကညီဒီကလုာ်တၢ်အိၣ်ဖှိၣ်ဖးဒိၣ်ဖဲ(၂၀၁၄)နံၣ်အတီၢ်ပူၤဒ်သိး
ကတၢၣ်ပီၣ်သကိးဝဲကညီဖီၣ်စုကဝဲၤကရူၢ်ဒီးကညီထံရူၢ်ကီၢ်သဲးကရူၢ်တဖၣ်အဘၢၣ်စၢၤခါဆူညါတၢ်မၤသကိးတၢ်လၢအအိၣ်ဒီးတၢ်ဃူတၢ်ဖိးအဂီၢ်န့ၣ်လီၤ.


ကညီတၢ်ဃူဖိးဒီးတၢ်မုာ်တၢ်ခုၣ်ကမံာ်တံး(KUPC)အတၢ်အိၣ်ဖှိၣ်ဖဲလါအ့ြဖ့ၣ်အသီ(၁၀)အနံၤဖဲပၠံၣ်အူလွ့ၣ်အံၤပာ်လီၤဝဲတၢ်ဆၢတဲာ်လၢကမၤဝဲကညီဒီကလုာ်တၢ်အိၣ်ဖှိၣ်ဖးဒိၣ်န့ၣ်လီၤ.

နီၢ်စူၣ်စဲနၣ်လၣ်လၣ်ခၠိၣ်လၢကညီပိာ်မုၣ်တၢ်လဲၤထီၣ်လဲၤထီကရူၢ်(KWEG)ရှဲပၠးဝဲကညီတၢ်ကစီၣ်,“တၢ်အၢၣ်လီၤတူၢ်လိာ်လၢပဒိးန့ၢ်အီၤဖဲတနံၤအံၤအတၢ်ကူၣ်လိာ်အိၣ်သကိးတၢ်အကတီၢ်မ့ၢ်ဝဲ
တၢ်ကမၤထံကီၢ်ဒီတဘ့ၣ်ကညီတၢ်အိၣ်ဖှိၣ်ဖးဒိၣ်လၢနံၣ်အဝဲအံၤအတီၢ်ပူၤန့ၣ်လီၤ.ဘၣ်ဆၣ်တၢ်တသ့ၣ်နံၤဖးသီဘၣ်ဒံးဝဲဒၣ်မုၢ်နံၤမုၢ်သီဒီးတၢ်လီၢ်တၢ်ကျဲဘၣ်န့ၣ်လီၤ.ဒ်လဲၣ်ဂ့ၤပတဲလီၤတံၢ်သ့
ဝဲဒၣ်လၢတၢ်ဂ့ၢ်တၢ်ကျိၤလၢတၢ်ကတၢၣ်ပီၣ်သကိးအီၤတဖၣ်ကပၣ်ဃုာ်ဝဲကညီဖိတဖၣ်ကမၤသကိးတၢ်လၢထံရူၢ်ကီၢ်သဲးအဂီၢ်လၢကျဲဒ်လဲၣ်,ကညီတၢ်ကရၢကရိတဖၣ်ကမၤသကိးတၢ်ဒ်လဲၣ်ဒီး
ကညီပှၤဖီၣ်စုကဝဲၤကရူၢ်တဖၣ်ကမၤသကိးတၢ်ဒ်လဲၣ်အဂ့ၢ်န့ၣ်လီၤ.”

ပဒိၣ်စီၤလၣ်ထိလၢ(KUPC)ကမံာ်တံးစံးဝဲလၢကညီဒီကလုာ်တၢ်အိၣ်ဖှိၣ်ဖးဒိၣ်အံၤကမ့ၢ်ဝဲတၢ်ခွဲးတၢ်ယာ်တခါလၢတၢ်ကတၢၣ်ပီၣ်သကိးတၢ်ဂ့ၢ်လၢကညီပှၤတဝၢတဖၣ်ပာ်ဖျါထီၣ်တ့ၢ်ဝဲ ဖဲအပူၤကွံာ်တၢ်ကူၣ်လိာ်အိၣ်သကိးတၢ်ဖဲအ့ၣ်ယၣ်ဝတံၣ်ကီၢ်ခီ,ပကိကီၢ်ခီ,တနီသရံၣ်ကီၢ်ခီ,တလၢၤကီၢ်စဲၣ်,ကညီကီၢ်စဲၣ်ဒီးကီၢ်ကၠီၣ်တဲၣ်ကီၢ်ပယီၤကီၢ်ဆၢဘၣ်ကီဘၣ်ခဲဒဲကဝီၤဒ်အမ့ၢ်
မဲၢ်လးဒီးအူးပၠၣ်ဒဲကဝီၤတဖၣ်န့ၣ်လီၤ.

ပှၤလၢအဟဲထီၣ်(KUPC)တၢ်ကူၣ်လိာ်အိၣ်သကိးတၢ်အတၢ်အိၣ်ဖှိၣ်အံၤမ့ၢ်ဝဲခ့ၣ်အဲၣ်ယူၣ်နဲၢ်ရွဲၢ်ခိၣ်ကျၢၢ်ပဒိၣ်စီၤကွဲၤထူဝ့,သုးခိၣ်ဖီဒိၣ်လၢအမ့ၢ်ကညီဖီၣ်စုကဝဲၤကရူၢ်တၢ်ဃူတၢ်ဖိးကမံာ်တံး
(KAOUC)အနဲၢ်ရွဲၢ်ခိၣ်ဒီးမါအီၣ်ပၠံၣ်စိလၢအမ့ၢ်(PSDP)ပှၤပၢၤလီၢ်ဆ့ၣ်နီၤတဖၣ်န့ၣ်လီၤ.

(KUPC)ကမံာ်တံးအံၤဘၣ်တၢ်ဒုးအိၣ်ထီၣ်အီၤဖဲလါမ့ၤ(၂၀၁၃)နံၣ်အတီၢ်ပူၤ,ဃုာ်ဒီးကရၢဖိ(၅၇)ဂၤန့ၣ်လီၤ.အတၢ်ပညိၣ်မ့ၢ်ဝဲဒ်သိးကမၤသကိးတၢ်လၢကညီကလုာ်အတၢ်အိၣ်မူခါဆူညါ
လၢအဂ့ၤအဂီၢ်န့ၣ်လီၤ.ကရၢဖိတဖၣ်ပၣ်ဃုာ်ဝဲဒၣ်ဒီးခၢၣ်စးသ့ၣ်တဖၣ်လၢကညီဖီၣ်စုကဝဲၤကရူၢ်,ကညီဂ့ၢ်ဝီကိတိာ်ဝဲၤကျိၤ,ကညီတၢ်ဘူၣ်တၢ်ဘါခိၣ်နၢ်တဖၣ်,ကညီဂံၢ်ခီၣ်ထံးပှၤတဝၢတၢ်
ကရၢကရိဒီးကညီထံရူၢ်ကီၢ်သဲးကရူၢ်တဖၣ်န့ၣ်လီၤ.