ကီၢ်ပယီၤကလံၤထံး,တနီသရံၣ်ဟီၣ်ကဝီၤပဒိၣ်ဟ့ၣ်လီၤတၢ်ခွဲးတၢ်ယာ်လၢခ့ၣ်အဲၣ်ယူၣ်(KNU)ကပျဲကညီသဝီတ ဖၣ်သိၣ်လိအဝဲသ့ၣ်အကျိာ်ဒီးကူသိးဝဲမိၢ်လုၢ်ပၢ်လၢ်တၢ်ကူတၢ်သိးဖဲကၠိန့ၣ်လီၤ.

လါနိၣ်ဝ့ဘၢၣ် ၈ သီအနံၤတၢ်အိၣ်ဖှိၣ်ဒီးခ့ၣ်အဲၣ်ယူၣ်ခိၣ်နၢ်တဖၣ်ဖဲဒဝဲၢ်အံၤဝံၤအလီၢ်ခံတနီသရံၣ်ပဒိၣ်ကိတိာ်တ ဖၣ်ဟ့ၣ်လီၤဝဲတၢ်ခွဲးတၢ်ယာ်လၢတၢ်ကသိၣ်လိကညီကျိာ်ဖဲကညီကၠိတဖၣ်န့ၣ်လီၤ.

ခ့ၣ်အဲၣ်ယူၣ်( KNU) မကွ့-ဒဝဲၢ်ကီၢ်ရ့ၣ်ပှၤပၢၤလီၢ်ဆ့ၣ်နီၤပဒိၣ်စီၤဘံလၢၢ်စံးဘၣ်ကညီတၢ်ကစီၣ်,“ပကတိၤသကိး တၢ်ဒီးတနီသရံၣ်ကိတိာ်ခိၣ်ကျၢၢ်ဒီးကိတိာ်ခိၣ်တဖၣ်အၢၣ်လီၤတူၢ်လိာ်ဝဲလၢတၢ်သိၣ်လိကညီကျိာ်အံၤမ့ၢ်တအိၣ်ဒီး တၢ်မၤဘၣ်ဒိဘၣ်ထံးဝဲကၠိတၢ်မၤလိမိၢ်ပှၢ်ဘၣ်ဒီးတၢ်သိၣ်လိဝဲကျိာ်အံၤသ့ဝဲဒၣ်န့ၣ်လီၤ. လၢပကစးထီၣ်သိၣ်လိက ညီကျိာ်အံၤအဂီၢ်ပဘၣ်ကတိၤသကိးတၢ်ဒီးဟီၣ်ကဝီၤကညီကၠိတဖၣ်ဒီးဃုထံၣ်န့ၢ်ကျိၤကျဲအဂ့ၤကတၢၢ်တဘိ လၢကသိၣ်လိကညီကျိာ်ဖဲပကၠိတဖၣ်အံၤအပူၤအဂီၢ်န့ၣ်လီၤ.”

ခ့ၣ်အဲၣ်ယူၣ်( KNU)လၢမကွ့-ဒဝဲၢ်ကီၢ်ရ့ၣ်ဒီးတနီသရံၣ်ပဒိၣ်အဘၢၣ်စၢၤတၢ်အိၣ်ဖှိၣ်တဘျီအံၤမ့ၢ်တၢ်အိၢ်ဖှိၣ်အ ဆိကတၢၢ်တဘျီလၢဘၣ်တၢ်ရဲၣ်ကျဲၤမၤအီၤမူးနီၢ်စးထီၣ်လၢခ့ၣ်အဲၣ်ယူၣ်စးထီၣ်မၤတၢ်တၢၣ်ပီၣ်သကိးတၢ်ဖဲ ၂၀၁၂ နံၣ်န့ၣ်လီၤ.

ပဒိၣ်စီၤဘံလၢၢ်စံးဝဲလၢတၢ်အံၤမ့ၢ်ခီၣ်ခါလၢအဂ့ၤတပတီၢ်ခီဖျိလၢအပူၤကွံာ်ပှၤသဝီဖိအါဒံအါဂၤသူၣ်ပျံၤသးဖုးဝဲ လၢအဝဲသ့ၣ်မ့ၢ်သိၣ်လိကညီကျိာ်လၢတဖိးသဲစးဘၣ်န့ၣ်ဒီးတၢ်မၤအၢမၤနးတၢ်တဖၣ်ကဟဲပိာ်ထွဲထီၣ်အခံန့ၣ်လီၤ.

“ပှၤအိၣ်ဖဲကညီသဝီတနီၤနီၤသးပျံၤဝဲဒၣ်လၢပဒိၣ်မ့ၢ်သ့ၣ်ညါလၢအဝဲသ့ၣ်သိၣ်လိကညီကျိာ်န့ၣ်ဒီးမ့ၢ်ပဒိၣ်ကဟံးန့ၢ်တၢ်ဂ့ၢ်လၢအဝဲသ့ၣ်မနုတမံၤလဲၣ်န့ၣ်လီၤ.ဘၣ်ဆၣ်ခဲကနံၣ်အံၤပဒုးသ့ၣ်ညါအဝဲသ့ၣ်သ့လၢအဝဲသ့ၣ်သိၣ်လိကညီကျိာ်ဖဲကၠိအပူၤသ့လံအဂ့ၢ်န့ၣ်လီၤ.”