ဖဲလါနိၣ်ဝ့ဘၢၣ် ၂၅ သီအနံၤ NLD ပှၤပၢၤလီၢ်ဆ့ၣ်နီၤအီၣ်စါစူးကၠံၣ်စံးဘၣ်မံၣ်စံၣ်မၣ်လၢအဝဲအသးဆူၣ်လၢကဖီၣ်လိာ်သကိး စုဒီးကီၢ်ပယီၤကလုာ်ဒူၣ်ကရူၢ်တဖၣ်ဖဲလၢအဝဲသ့ၣ်မၤတၢ်တၢၣ်ပီၣ်တဲကျဲၤသကိးတၢ်ဒီးပဒိၣ်ဘၣ်ဃးထံကီၢ်ဒီဘ့ၣ်တၢ်မုာ်တၢ် ခုၣ်အကျိၤအကျဲအကတီၢ်န့ၣ်လီၤ.

စူးကၠံၣ်ထံၣ်လိာ်သးဒီး UNFC နဲၢ်ရွဲၢ်န့ၣ်ဟဲၣ်သၣ်ဒီးခူ(န်)အ့ဘဲ(လ်)ပှၤပၢၤလီၢ်ဆ့ၣ်နီၤခိၣ်ခံဂၤတဂၤဒီးဒ့ဘံၣ်သးကပီၤသ့ၣ် တဖၣ်ဖဲအဟံၣ်,ဝ့ၢ်တကူၣ်န့ၣ်လီၤ. ကလုာ်ဒူၣ်ဖီၣ်စုကဝဲၤကရူၢ်အါဖုပၣ်ဃုာ်စ့ၢ်ကီးဖဲတၢ်ထံၣ်လိာ်သးအံၤန့ၣ်လီၤ.

အဝဲစံးဝဲ,“ယကမၤလၢပှဲၤကလုာ်ဒူၣ်အတၢ်လိၣ်ဘၣ်တဖၣ်ထီဘိန့ၣ်လီၤ.ဖဲလၢပမၤသကိးတၢ်လၢတၢ်မုာ်တၢ်ခုၣ်အကတီၢ်ပ ဘၣ်ကွၢ်မ့ၢ်ပှၤလၢအဂၤတဖၣ်မၤတၢ်မနုၤလဲၣ်ဒ်သိးပကသ့ၣ်ညါပနီၢ်ကစၢ်ဒၣ်ဝဲကဘၣ်မၤမနုၤလဲၣ်အဂီၢ်န့ၣ်လီၤ.”

ကရူၢ်အံၤတၢၣ်ပီၣ်သကိးတၢ်ဘၣ်ဃးကလုာ်ဒူၣ်အတၢ်မိၣ်န့ၢ်သးလီတဖၣ်တကးဒံးဘၣ်တၢၣ်ပီၣ်သကိးတၢ်ဘၣ်ဃးတၢ်ဒုးအိၣ်ထီၣ်ထံလီၢ်ကီၢ်ပူၤတၢ်မုာ်တၢ်ခုၣ်ဒီးတၢ်သူၣ်ထီၣ်ဒံၣ်မိၣ်ြခ့ၣ်တံးကီၢ်စၢဖှိၣ်အတၢ်မၤကျဲတဖၣ်န့ၣ်လီၤ.

ဒီၣ်အီၣ်စါစူးကၠံၣ်မ့ၢ်တပာ်ဂၢၢ်ပာ်ကျၢၤဘၣ်ဒံးအတၢ်တိာ်ကျဲၤလၢကလဲၤထီၣ်ကလုာ်ဒူၣ်ဖီၣ်စုကဝဲၤကရူၢ်တဖၣ်အတၢ်အိၣ်ဖှိၣ်ဖဲလါဒံၣ်စဲဘၢၣ်အံၤဒၣ်လဲာ်အဝဲစံးဝဲလၢကမၤသကိးတၢ်ဒီးကရူၢ်ဘၣ်ထွဲသ့ၣ်တဖၣ်ဒ်သိးဒီးတၢ်ကဒိးန့ၢ်ဘၣ်တၢ်မုာ်တၢ်ခုၣ်ဒီးတၢ်ဃူတၢ်ဖိးအဂီၢ်န့ၣ်လီၤ.

ခဲကနံၣ်အံၤကီၢ်ပယီၤကလုာ်ဒူၣ်ကရူၢ်တဖၣ်ပာ်လီၤဝဲတၢ်ပတုာ်တၢ်ခးတၢ်မၤအတကွီၣ်ဒီးတၢ်ဘျၢလၢတၢ်ကဘၣ်လူၤပိာ်မၤ ထွဲအီၤတဖၣ်န့ၣ်လီၤ. ဒီးတၢၣ်ပီၣ်သကိးတၢ်ဘၣ်ဃးတၢ်ဒုးအိၣ်ထီၣ်ကီၢ်စၢဖှိၣ်ကရၢဒီးသုးမုၢ်စၢဖှိၣ်ဒီးတၢ်ဘှီဘၣ်မၤဂ့ၤထီၣ်က့ၤ /ရဲၣ်ကျဲၤဘၣ်က့ၤတၢ်ဘျၢသဲစးခိၣ်သ့ၣ်တဖၣ်န့ၣ်လီၤ.