ကညီပိာ်မုၣ်တၢ်ကရၢကရိအကါဒိၣ်ခံဖုလၢအမ့ၢ်ကညီပိာ်မုၣ်ကရၢ(KWO)ဒီးကညီပိာ်မုၣ်တၢ်ဂုၤထီၣ်ပသီထီၣ်ကရူၢ်( KWEG)သ့ၣ်တဖၣ်မၢန့ၢ်ဆီၣ်ခံဝဲကီၢ်ပယီၤပဒိၣ်လၢကမၤဂ့ၤထီၣ်က့ၤဝဲပိာ်မုၣ်အတၢ်ခွဲးတၢ်ယာ်
တဖၣ်ဖဲထံလီၢ် ကီၢ်အပူၤဒ်အမ့ၢ်ဝဲတၢ်မၤလၤကပီၤဝဲဟီၣ်ခိၣ်ဒီဘ့ၣ်ပိာ်မုၣ်မုၣ်နံၤန့ၣ်လီၤ. ဒီးဂ့ၢ်လိာ်ဘှီလိာ်တၢ်ဒီးစံးဝဲလၢတၢ်မ့ၢ် တပာ်ကဲဝဲပိာ်မုၣ်အတၢ်ခွဲးတၢ်ယာ်တဖၣ်ဘၣ်ဒီးတၢ်ဒိးန့ၢ်ဝဲတၢ်မုာ်တၢ်ခုၣ်တသ့ဝဲဘၣ်န့ၣ်လီၤ.

ဖဲတနံၤအံၤအတီၢ်ပူၤကရူၢ်ခံဖုအံၤထုးထီၣ်သကိးဝဲတၢ်ဘိးဘၣ်သ့ၣ်ညါလီၤတၢ်ဖဲတၢ်ကစီၣ်အပူၤဒီးစံးဝဲလၢ,“ကီၢ်ပယီၤပိာ်မုၣ်သ့ၣ်တဖၣ်အဂီၢ်တၢ်တီတၢ်ြတၢ်မ့ၢ်တအိၣ်ဘၣ်ဒီးတၢ်မုာ်တၢ်ခုၣ်လီၤထူလီၤယိာ်အံၤအိၣ်ထီၣ်ဝဲတသ့ဘၣ်န့ၣ်
လီၤ”.

ကရူၢ်တဖၣ်အံၤစံးဝဲ,“ပဃ့ထီၣ်ဝဲလၢပယီၤသုးမုၢ်တဖၣ်ကမၤပတုာ်ကွံာ်ဝဲမုၢ်ခွါသွံၣ်ထံဖံးညၣ်တၢ်မၤဆူၣ်မၤစိးဖဲကညီကီၢ်စဲၣ်အပူၤန့ၣ်လီၤ. ကညီပိာ်မုၣ်တဖၣ်,ဒ်လၢပိာ်မုၣ်ခဲလၢာ်တဖၣ်အသိးတြကၢးတၢ်မၤဆူၣ်အီၤလၢက
အိၣ်လၢတၢ်ပျံၤတၢ်ဖုးအပူၤဘၣ်န့ၣ်လီၤ.ခဲကနံၣ်အံၤပယီၤသုးမုၢ်တဖၣ်လုၢ်သ့ၣ်ခါပတာ်ဝဲဟီၣ်ခိၣ်ဒီဘ့ၣ်ပှၤဟီၣ်ခိၣ်ဖိအခွဲးအယာ်တဖၣ်လၢတၢ်တအိၣ်ဒီးတၢ်ဒိးန့ၢ်ဘၣ်ဝဲတၢ်စံၣ်ညီၣ်ဃၣ်အီၤဘၣ်န့ၣ်လီၤ. ပိာ်မုၣ်တဖၣ်ကတီၣ်ဖျါထီၣ်ကွီၢ်မ့ၣ် သ့ၣ်တဖၣ်လၢတၢ်ပူၤတၢ်ဖျဲးအပူၤဒ်သိးတၢ်ကဟဲစိာ်ဃီၤဝဲပှၤလၢမၤကမၣ်ကွီၢ်မ့ၣ်တဖၣ်ဆူတၢ်တီတၢ်ြတၢ်ကသ့အဂီၢ်ကျိၤကျဲလၢတုၤလီၤတီၤလီၤတအိၣ်ဝဲဘၣ်န့ၣ်လီၤ.”

“ဒီကလုာ်ပှၤဟီၣ်ခိၣ်ဖိတၢ်ခွဲးတၢ်ယာ်ခီမ့ရှၢၣ်ဘၣ်ဃးဒီးပဒိၣ်အံၤတအိၣ်ဒီးတၢ်ဖိးဒီးသဲစး,တၢ်စိတၢ်ကမီၤ,မ့တမ့ၢ် တအိၣ်ဒီးတၢ်န့ၢ်စိန့ၢ်ကမီၤလၢလၢပှဲၤပှဲၤလၢကဃိထံသမံသမိးဒီးကစံၣ်ညီၣ်သုးဖိသ့ၣ်
တဖၣ်န့ၣ်လီၤ. လၢတၢ်န့ၣ် အဃိခီမ့ရှၢၣ်အံၤဂ့ၢ်လိာ်ဝဲဒၣ်လၢကဃိထံသမံသမိးတၢ်ဂ့ၢ်တၢ်ကျိၤဘၣ်ဃးတၢ်ဟံးန့ၢ်ကွီၢ်အံၤလၢလၢပှဲၤပှဲၤန့ၣ်လီၤ.ကီၢ်ပယီၤပိာ်မုၣ်တဖၣ်လိၣ်ဘၣ်ကျိၤကျဲအတီအလိၤဒီးတုၤလီၤ တီၤလီၤလၢတၢ်ကတီၣ်ဖျါထီၣ်ဝဲကွီၢ်မ့ၣ်သ့ၣ် တဖၣ်ဒ်သိးဒီးပှၤမၤကမၣ်ကွီၣ်မ့ၣ်သဲစးတဖၣ်ကအိၣ်ဒီးတၢ်ဟံးန့ၢ်မူဒါလၢအတၢ်မၤကမၣ်ကွီၢ်မ့ၣ်သဲစးအဖီခိၣ်ဒီးတၢ်ဒိးန့ၢ်ဘၣ်ဝဲတၢ်စံၣ်ညီၣ်တဲာ်လၢအတီ အလိၤအဂီၢ်န့ၣ်လီၤ. ပဃ့ထီၣ်ကီၢ်ပယီၤပဒိၣ်လၢကမၤဘၣ်လိာ်ဝဲတၢ် လၢအတၤတၢ်ဒီးပှၤ(တၢ်ကီတၢ်ခဲ)သ့ၣ်တဖၣ်အံၤလၢတၢ်မၤလၤကပီၤဝဲဟီၣ်ခိၣ်ဒီဘ့ၣ်ပိာ်မုၣ်တဖၣ်အမုၢ်နံၤအံၤန့ၣ်လီၤ.”

ကညီကရူၢ်ခံဖုအံၤဃ့ထီၣ်ဝဲကီၢ်ပယီၤပဒိၣ်ဒီးကညီထံရူၢ်ကီၢ်သဲးတၢ်ကရၢကရိခံဖုလၢာ်လၢကဟ့ၣ်ဒုးပၣ်ဃုာ်အါထီၣ်ပိာ်မုၣ်သ့ၣ်တဖၣ်ဖဲတၢ်မုာ်တၢ်ခုၣ်အကျိၤအကျဲအပူၤတကးဒံးဘၣ်လၢတၢ်မၤတၢ်ဆၢတဲာ်အပူၤစ့ၢ်
ကီးန့ၣ်လီၤ.ကညီပိာ်မုၣ်တၢ်ကရၢကရိတဖၣ်ဃ့ထီၣ်ဝဲပဒိၣ်ဒီးကလုာ်ဒူၣ်ဖီၣ်စုကဝဲၤကရူၢ်လၢအပၣ်ဃုာ်ဖဲတၢ်မုာ်တၢ်ခုၣ်အတၢ်ကတိၤသကိးတၢ်အပူၤတဖၣ်ဒ်သိးကပာ်ပနီၣ်ဝဲလၢပိာ်မုၣ်တဖၣ်တိစၢၤမၤစၢၤတၢ်ဖဲကျိၤကျဲတဖၣ်
အပူၤအံၤသ့ဝဲအဂ့ၢ်န့ၣ်လီၤ.

“ဟီၣ်ခိၣ်ဒီဘ့ၣ်ပှၤတဝၢပာ်ပနီၣ်တ့ၢ်ဝဲယံာ်တ့ၢ်မးလံလၢပိာ်မုၣ်အတၢ်တိစၢၤမၤစၢၤအံၤမ့ၢ်တၢ်အကါဒိၣ်ဒီးအဝဲသ့ၣ်ကၢးဟ့ၣ်တၢ်တိစၢၤမၤစၢၤတၢ်ဆူတၢ်ဒိးန့ၢ်ဘၣ်တၢ်မုာ်တၢ်ခုၣ်အဂီၢ်န့ၣ်လီၤ.”

ကရူၢ်ခံဖုအံၤပာ်ဖျါထီၣ်စ့ၢ်ကီးဝဲတၢ်သူၣ်ကိၢ်သးဂီၤလၢထံကီၢ်တၢ်သိၣ်တၢ်သီဘၣ်ဃးတၢ်တ့တၢ်ဖျီ (တၢ်သ့ၣ်ညါစ့ၢ် ကီးအီၤဒ်အမ့ၢ်ထံဖိကီၢ်ဖိကလုာ်ဒူၣ်တၢ်ဒီသဒၢအတၢ်သိၣ်တၢ်သီ)လၢဘၣ်တၢ် ဆှၢနုာ်လီၤ အီၤအံၤအဂ့ၢ်န့ၣ်လီၤ. တၢ်သိၣ်တၢ်သီတၢ်ဘျၢလၢဘၣ်တၢ်ဆှၢနုာ်လီၤအီၤအံၤပာ်လီၤဝဲတၢ်ဖီၣ်ဃံးဃာ်ပိာ်မုၣ်အတၢ်ခွဲးတၢ်ယာ်လၢကဖျီသးဒီးပှၤလၢအအဲၣ်ဝဲ,လၢတအိၣ်ဒီးတၢ်ကွၢ်မဲာ်ဝဲ ကလုာ်ဒူၣ်အဂံၢ်ခီၣ်ထံးအံၤဘၣ်န့ၣ်လီၤ.

ကညီပိာ်မုၣ်ကရၢ(KWO)ဒီးကညီပိာ်မုၣ်တၢ်ဂုၤထီၣ်ပသီထီၣ်ကရူၢ်( KWEG)သ့ၣ်တဖၣ်မၢန့ၢ်ဆီၣ်ခံဝဲပဒိၣ်ဒ်သိးက ပာ်ဂၢၢ်ပာ်ကျၢၤဝဲအတၢ်အၢၣ်လီၤအီလီလၢကပျၢ်ဟးထီၣ်ကွံာ်ထံရူၢ်ကီၢ်သဲးဃိာ်ဖိဖဲ ကီၢ်ပယီၤအပူၤ,ပၣ်ဃုာ်ဒီးပိာ် မုၣ်တဖၣ်န့ၣ်လီၤ.