ပှၤသဝီဖိတဖၣ်လၢကမၤတၢ်ဆၢတဲာ်ဘၣ်ဃးတၢ်တ့ထီၣ်ဂာ်လၢၢ်ကမူၣ်ဖဲအဝဲသ့ၣ်လီၢ်ကဝီၤအပူၤအဂီၢ်ဒိးန့ၢ်ဘၣ် ဝဲတၢ်ဟ့ၣ်ခွဲးလၢပဒိၣ်ခိၣ်နၢ်ဒီးခ့ၣ်အဲၣ်ယူၣ်ခိၣ်နၢ်တဖၣ်န့ၣ်လီၤ.

ခီဖျိလၢသဝီဖိတဖၣ်ထီဒါတၢ်တ့ထီၣ်ဂာ်လၢၢ်ကမူၣ်တၢ်မၤလီၢ်ဖဲမံၣ်ကယ့ၤလီၢ်ကဝီၤဖဲကညီကီၢ်စဲၣ်အံၤအဃိဖဲလၢကမျၢၢ်တၢ်ထံၣ်လိာ်အိၣ်ဖှိၣ်သကိးတၢ်အကတီၢ်ခ့ၣ်အဲၣ်ယူၣ်ဒီး
ပဒိၣ်ခိၣ်နၢ်တဖၣ်စံးဝဲလၢခဲကနံၣ်အံၤတၢ်မၤတၢ်ဆၢတဲာ်ဘၣ်ဃးတၢ်တိာ်ကျဲၤအံၤအိၣ်ဝဲဒၣ်လၢသဝီဖိတဖၣ်အစုပူၤန့ၣ်လီၤ.

ကညီကီၢ်စဲၣ်ခိၣ်နၢ်,လီၢ်ကဝီၤခ့ၣ်အဲၣ်ယူၣ်ခိၣ်နၢ်,ခီပနံာ်ခၢၣ်စးဒီးလီၢ်ကဝီၤသဝီဖိတဖၣ်အဘၢၣ်စၢၤကမျၢၢ်တၢ်ထံၣ်လိာ်အိၣ်ဖှိၣ်သကိးတၢ်ဖဲလါအ့ြဖ့ၣ်(၂၈)သီအနံၤအကတီၢ်,
ခ့ၣ်အဲၣ်ယူၣ်ခိၣ်နၢ်တဖၣ်လၢဒူသထူၣ်ကီၢ်ရ့ၣ်စံးဝဲလၢထဲဒၣ်ကမျၢၢ်ကဟ့ၣ်ခွဲးတၢ်တ့ထီၣ်ဂာ်လၢၢ်ကမူၣ်တၢ်မၤလီၢ်အံၤသ့ဝဲန့ၣ်လီၤ.

ပဒိၣ်စီကၠီၣ်မၠံၣ်လၢအမ့ၢ်ဒူသထူၣ်ကီၢ်ရ့ၣ်ခ့ၣ်အဲၣ်ယူၣ်တၢ်ဆဲးကျိးပှၤဘၣ်မူဘၣ်ဒါစံးဘၣ်ကညီတၢ်ကစီၣ်ဘၣ်ဃးတၢ် ဆှၢနုာ်လီၤတၢ်တ့ထီၣ်တၢ်မၤလီၢ်အံၤန့ၣ်လီၤ.

“ပအိၣ်ဒီးတၢ်တိာ်သူၣ်ပာ်သးလၢကဟ့ၣ်ခွဲးတၢ်တ့ထီၣ်ဂာ်လၢၢ်ကမူၣ်တၢ်မၤလီၢ်ထဲဒၣ်လၢတၢ်တိာ်ကျဲၤအံၤမ့ၢ်ဘၣ်ဘျူးဘၣ်ဖှိၣ်ပပှၤကမျၢၢ်နီၢ်နီၢ်န့ၣ်လီၤ.ပထံၣ်လိာ်သးဒီးပှၤလီၢ်ကဝီၤ ဖိတဖၣ်ဒ်သိးအဝဲသ့ၣ်တဖၣ်ကပာ်ဖျါထီၣ်အတၢ်မိၣ်န့ၢ်သးလီတဖၣ်အဂီၢ်န့ၣ်လီၤ.”

ကမျၢၢ်တၢ်ထံၣ်လိာ်အိၣ်ဖှိၣ်သကိးဖဲမံၣ်ကယ့ၤသဝီအကတီၢ်ပှၤဟဲထီၣ်တၢ်အိၣ်ဖှိၣ်အိၣ်အါန့ၢ်ဒံး(၁,၀၀၀)ဂၤ,ပၣ်ဃုာ်ဒီးကညီကီၢ်စဲၣ်ကိတိာ်ခိၣ်ဒ်အမ့ၢ်ကျဲဒီးတၢ်ဆဲးကျိးကိတိာ်ခိၣ်
စီခ့ၣ်မီၣ်မၠံၣ်,အူစီဆၣ်လီၤလးလၢသ့ၣ်ပှၢ်ဒီးဟီၣ်လးပနံာ်ကိတိာ်ဝဲၤကျိၤ,စီကၠံၣ်လ့လၢလီမ့ၣ်ဂံၢ်သဟီၣ်ဒီးစဲးဖီကဟၣ်တၢ်မၤလီၢ်ကိတိာ်ဝဲၤကျိၤ,တၢ်ဆဲးကျိးမူဒါခိၣ်ပဒိၣ်စီကၠီၣ်မၠံၣ်လၢ
ခ့ၣ်အဲၣ်ယူၣ်ဒူသထူၣ်ကီၢ်ရ့ၣ်,သုးခိၣ်စီၤအံသၣ်,ကီၢ်ရ့ၣ်ပှၤပၢဆှၢရဲၣ်ကျဲၤတၢ်ပဒိၣ်စီနူၢ်ယ့ၤ,ဖၣ် အၣ်ကီၢ်ဆၣ်ပှၤပၢၤလီၢ်ဆ့ၣ်နီၤအူစဲၤမၠိဝ့,ပၢဆှၢတၢ်မူဒါခိၣ်လၢကီၢ်ပယီၤကၠံၣ်ဒိ
ဂာ်လၢၢ်ကမူၣ်ခီပနံာ်(Ji Dong Cement Co. Ltd)ဒီးပှၤလီၢ်ကဝီၤဖိတဖၣ်န့ၣ်လီၤ.

ခ့ၣ်အဲၣ်ယူၣ်ပာ်ဖျါဝဲဒၣ်လၢကမျၢၢ်မ့ၢ်ဟ့ၣ်ခွဲးတၢ်တိာ်ကျဲၤအံၤန့ၣ်ဒီးခီပနံာ်စံးဝဲလၢအဝဲသ့ၣ်ကဟ့ၣ်မၤစၢၤဝဲတၢ်ကူၣ်ဘၣ်ကူၣ်သ့,ဆူၣ်ချ့တၢ်အံးထွဲကွၢ်ထွဲ,တၢ်ဖံးတၢ်မၤအခွဲးအယာ်တဖၣ်,
ထံ,လီမ့ၣ်အူ,တၢ်တ့ထီၣ်ကျဲဒီးတိၤသ့ၣ်တဖၣ်န့ၣ်လီၤ.

စီခ့ၤမီၤမၠံၣ်ကတိၤလီၤတၢ်ဖဲကမျၢၢ်တၢ်ထံၣ်လိာ်အိၣ်ဖှိၣ်သကိးတၢ်အံၤဒီးစံးဝဲလၢကညီကိတိာ်ခိၣ်တဖၣ်ဟဲထီၣ်ဝဲဒၣ်တၢ်အိၣ်ဖှိၣ်ဒ်သိးကသ့ၣ်ညါဘၣ်ဝဲတၢ်ဂ့ၢ်ဘၣ်ဃးပှၤသဝီဖိအတၢ်
ထီဒါတၢ်တိာ်ကျဲၤအံၤန့ၣ်လီၤ.