ခီဖျိဟီၣ်လာ်မ့ၣ်ပိၢ်ပိၢ်ဖးထီၣ်အဃီသဝီဖိသံ(၁)ဂၤဒီးဘၣ်ဒိ(၅)ဂၤဖဲနီၢ်တးတၢ်လီၢ်လၢအဘူးဒီးအူမူထၣ်သဝီ,လူၢ်ပျဲၢ်ကီၢ်ဆၣ်,ကီၢ်ရ့ၣ်ဖၣ်အၣ်အပူၤန့ၣ်လီၤ.

“ဖဲလါမ့ၤထီၣ်(၂၅)သီအနံၤမုၢ်ဃ့ၢ်လီၤ(၁)နၣ်ရံၣ်အဆၢကတီၢ်,သဝီဖိတဂၤထံၣ်ဝဲဟီၣ်လာ်မ့ၣ်ပိၢ်တဖျၢၣ်ဖဲအခုးဃၢၤဒီးခူၣ်ထီၣ်ဝဲဝံၤဟဲက့ၤစိာ်ဝဲဒီးအဲးထီၣ်ကွၢ်သကိးဝဲအခါဟီၣ်လာ်မ့ၣ်ပိၢ်အံၤ
ပိၢ်ထီၣ်ဒီးဘၣ်ဒိဝဲပှၤခဲလၢာ်(၆)ဂၤအကျါပိာ်မုၣ်ဖိသၣ်လၢအသးနံၣ်အိၣ်(၆)နံၣ်တဂၤသံဝဲ,”အဂ့ၢ်န့ၣ်ပဒိၣ်အဲၣ်ကလုာ်ရွှ့ၣ်အူလၢအမ့ၢ်ခ့ၣ်အဲၣ်ယူၣ်ဆူၣ်ချ့မၤစၢၤဝဲၤကျိၤခိၣ်စံးဝဲန့ၣ်လီၤ.

ပဒိၣ်အဲၣ်ကလုာ်ရွှ့ၣ်အူစံးဝဲ“ပှၤဘၣ်ဒိအကျါ,တဂၤအမံာ်ချံလၢအစ့ၣ်တပၤဟးဂီၤကွံာ်,တဂၤအစုခံကပၤလၢာ်ဟးဂီၤဒီးခံဂၤအသးနါပှၢ်ဘၣ်ဒိနးနးကျံၤကျံၤလီၤ.ပှၤဘၣ်ဒိသ့ၣ်
တဖၣ်အံၤခဲအံၤတၢ်ဆှၢအီၤဆူကီၢ်ကၠီၣ်တဲၣ်တၢ်ဆါဟံၣ်န့ၣ်လီၤ.”

ဖိသၣ်မုၣ်ဖိလၢအသံအံၤအမံၤမ့ၢ်ဝဲနီၢ်မၤဒံ,ဒီးသဝီဖိ(၅)ဂၤလၢအဘၣ်ဒိမ့ၢ်ဝဲစီကၠိဖၠါ,စီဒံၣ်ဟဲ,စီဖါဘဲ,စီဖါဟိဒီးစီကၠိခရံၣ်သ့ၣ်တဖၣ်န့ၣ်လီၤ.

တၢ်လီၢ်လၢတၢ်ကဲထီၣ်သးအံၤစီၤစုၤဒီးကီၢ်ဆၢသူမှဲကျိနံၤ(၂)ကံလိမံထၢၣ်ဒီးတၢ်လီၢ်အံၤလၢအပူၤကွံာ်မ့ၢ်ဝဲတၢ်ဒုးတၢ်ယၤအလီၢ်န့ၣ်လီၤ.