လၢတၢ်ကတီၤသးလၢ ထံရူၢ်ကီၢ်သဲးတၢ်စံးကတိၤတၢ်မုာ်တၢ်ခုၣ်အဂီၢ် ကလုာ်ဒူၣ်ဒီကလုာ်ဂ့ၢ်၀ီ၀ဲၤလီၢ် Ethnic National Affairs Center
(ENAC) မၤတၢ်ထံၣ်လိာ်အိၣ်ဖှိၣ်သကိးဒီး ကညီထံရူၢ်ကီၢ်သဲးကရၢ ဒီးကမျၢၢ် ကရၢတဖၣ် ဒ်သိးကတၢၣ်ပီၣ်သကိးတၢ်ဂ့ၢ်ဘၣ်ဃးတၢ်
ပာ်လီၤကလုာ်ဒူၣ်ဂ့ၢ်၀ီ ဖီလ်စံၣ် သ့ၣ်တဖၣ်လီၤ.

တၢ်အိၣ်ဖှိၣ်လၢ ဘၣ်တၢ်မၤအီၤလါမ့ၤ (၁၂) သီအနံၤ ပှၤလၢဟဲ ထီၣ် တၢ်အိၣ်ဖှိၣ်တဖၣ်မ့ၢ်၀ဲ ကညီဒီကလုာ်စၢဖှိၣ်ရၢခၢၣ်စးဒီးကညီပှၤ
တ၀ၢတၢ်ကရၢကရိ ခၢၣ်စးတဖၣ်လီၤ. ဖဲတၢ်အိၣ်ဖှိၣ်အ ဆၢကတီၢ်, တၢ်စံးကတိၤသကိးတၢ်ဂ့ၢ် သ့ၣ်တဖၣ်မ့ၢ် တၢ်ဂ့ၢ်ခွံ ထံၣ်လၢဘၣ်
ဃးကလုာ်ဒူၣ်ဂ့ၢ်၀ီဖီလ်စံၣ် လၢတၢ်ကတီၤမၤဆိ ပာ်အီၤ ဒ်သိးကကဲဘျုးလၢ တၢ်စံးကတိၤထံရူၢ်ကီၢ်သဲးအဂ့ၢ်ဒီး ကီၢ်ပဒိၣ်ခဲကၢာ်အဂီၢ်
န့ၣ်လီၤ.ဒီးခီဖျိတၢ်တဲသကိးထံရူၢ်ကီၢ်သဲး ဒီးကီၢ်ပဒိၣ်အဃိ တၢ်မုၢ်လၢ်၀ဲလၢ လၢခံကတၢၢ် တၢ်ကသူၣ်ထီၣ် န့ၢ် ဖဲဒရဲၣ်ကီၢ်စၢဖှိၣ်န့ၣ်
လီၤ.

ကိၤယီထီၤ လၢအမ့ၢ်ပှၤပၢဆှၢရဲၣ်ကျဲၤတၢ်လၢ ENAC စံးဘၣ် ကညီတၢ်ကစီၣ်သန့လၢ တၢ်အိၣ်ဖှိၣ်အ၀ဲအံၤအတၢ် ပညိၣ်မ့ၢ်၀ဲဒ်သိး
ဒီးတၢ်လီၤပလိာ်ကအိၣ်၀ဲအဂီၢ် ဖဲကလုာ်ဒူၣ်ဒီကလုာ်ဂ့ၢ်၀ီတၢ် အိၣ်ဖှိၣ်သကိးလၢ တၢ်ကဆီလီၤပာ်လီၤ ဖီလ်စံၣ် အဆၢကတီၢ်န့ၣ်လီၤ.

ကိၤယီထီၤ ကတိၤတၢ်ဒီးကညီတၢ်ကစီၣ်သန့ စံး၀ဲ,

"ကလုာ်ဒူၣ်ဒီကလုာ်ဂ့ၢ်၀ီဖီလ်စံၣ် လၢတၢ်ဆီလီၤပာ်လီၤဆိအီၤတဖၣ် တၢ်ဒိးသန့ာ်ထီၣ်အီၤလၢ ကလုာ်ဒူၣ်လၢအဆဲးလီၤ NCA စုမုၢ်
ကျၢၢ်မ့ၢ်ဂ့ၤ တဆဲးလီၤဒံးတဖၣ်မ့ၢ်ဂ့ၤ အဖီလ်စံၣ်ဖီခိၣ်ဒ်သိးဒီး တၢ်လီၤပလိာ်ကအိၣ်အဂီၢ်လီၤ. ဖီလ်စံၣ်သ့ၣ်တဖၣ်အံၤ တုၤမ့ၢ် တၢ်စံးက
တိၤထံရူၢ်ကီၢ်သဲးအဂ့ၢ်အဆၢကတီၢ်ခဲကၢာ် တၢ်စူးကါအီၤသ့ ဒီးတၢ်ကဘၣ်ပၢနုာ်ဃုာ်အီၤလၢ ထံကီၢ်သဲစးတၢ်ဘျၢမိၢ်ပှၢ်အ ပူၤန့ၣ်လီၤ."

ဖီလ်စံၣ်လၢတၢ်ပာ်လီၤဆိအီၤတဖၣ်အံၤ ဘၣ်တၢ်ရဲၣ်ကျဲၤကတဲၤကတီၤအီၤလၢ ကလုာ်ဒူၣ်လၢဖီၣ်စုက၀ဲၤတဖၣ်, ထံရူၢ်ကီၢ်သဲးပၣ်တံၣ်
တဆံခံဖု လၢကီၢ်ပယီၤအပူၤ, ကလုာ်ဒူၣ်ပှၤတ၀ၢ တၢ်ကရၢကရိ ဒီးကမျၢၢ်ပှၤတ၀ၢတၢ်ကရၢကရိလၢ ၂၀၁၄ အဆၢကတီၢ်တဖၣ်လီၤ.

ဖီလ်စံၣ်လၢတၢ်ဆီလီၤပာ်ဆိအီၤတဖၣ် ပၣ်ဃုာ်၀ဲတၢ်ဂ့ၢ်မိၢ်ပှၢ်လၢအမ့ၢ် တၢ်ကူၣ်ဘၣ်ကူၣ်သ့, တၢ်ပၢဘၣ်ဟီၣ်ခိၣ်ကပံာ်အလီၢ်, န့
ဆၢၣ်ဟီၣ်ခိၣ်သ့ၣ်ပှၢ်အကံၢ်အစီ, တၢ်သူၣ်တၢ်ဖျး, ပှၤလီၢ်အိၣ်ကမှံအဂ့ၢ်, ပှၤဘၣ်ကီဘၣ်ခဲအဂ့ၢ်, တၢ်မၤစၢၤဆီၣ်ထွဲဘၣ်ဃး ပှၤကူပှၤ
ကညီအတၢ်ဒိသူၣ်ဒိသး, တၢ်ထၢတၢ်ခိတၢ်သွဲ, တၢ်ပနံၤတၢ်ကၤဒီး တၢ်ဘျၢလီၤစ့အဂ့ၢ်သ့ၣ်တဖၣ်လီၤ.

တၢ်အိၣ်ဖှိၣ်လၢတၢ်မၤအီၤလၢမဲၢ်ဆီးအံၤ, ကရၢခၢၣ်စးလၢဟဲထီၣ်တၢ်အိၣ်ဖှိၣ်တဖၣ်မ့ၢ်၀ဲ, ကညီပိာ်မုၣ်ကရၢ, ကညီသးစၢ်ကရၢ,က
ညီပှၤလီၢ်အိၣ်ကမှံကမံးတံာ်, ကညီကၠိဖိပှာ်ဘျးစဲကရူၢ်, ကညီပှၤဂ့ၢ်၀ီခွဲးယာ်ကရူၢ်, ထၢၣ်ပုချၢတၢ်အိၣ်ဆူၣ်အိၣ်ခ့ျပှၤမၤတၢ်ဖိက
ရူၢ်,ကီၢ်ပယီၤကသံၣ်သရၣ်ကရၢ, မဲၢ်တီတၢ်ဆါဟံၣ်, ကညီဆူၣ်ခ့ျမၤစၢၤ၀ဲၤကျိၤ, ကီၢ်သူလ့ၤပနံၤတၢ်ကၤစၢဖှိၣ်ကရၢ, ကညီခိၣ်ဃၢၤ
န့ဆၢၣ်ဒီး ပှၤဂ့ၢ်၀ီဟူးဂဲၤပှာ်ဘျးစဲ, ကညီတၢ်ကူၣ်ဘၣ်ကူၣ်သ့၀ဲၤကျိၤ ဒီး ကညီဘၣ်ကီဘၣ်ခဲကမံးတံာ်တဖၣ်လီၤ. ကရူၢ်ကရၢသ့ၣ်
တဖၣ်အံၤတဲသကိးတၢၣ်ပီၣ်သကိး၀ဲတၢ်ဂ့ၢ်ဒီး ဘှီဘၣ်မၤဂ့ၤထီၣ်သကိးတၢ်ဘျၢဖီလ်စံၣ် ဒ်အလီၢ်အိၣ်အသိးန့ၣ်လီၤ.