ဒ်သိး ကဟ့ၣ်ဂံၢ်ဟ့ၣ်ဘါ တၢ်မၤလိတၢ်အကံၢ်အစီ ဖဲဖိသၣ်မၤလိဒံးတီၤဖုၣ်အဆၢကတီၢ် ဒီး လၢကဟံးဃာ်ကၠိသရၣ်
လၢအိၣ်ဒီးတၢ် လဲၤခီဖျိတဖၣ်အဂီၢ်, တၢ်ကူၣ်ဘၣ်ကူၣ်သ့ကိတိၤ လၢဂံၢ်ခီၣ်ထံးတၢ်ကူၣ်ဘၣ်ကူၣ်သ့၀ဲၤကျိၤတခီ,
ကသုးထီထီၣ်ကၠိသရၣ်ပတီၢ်လၢ ကၠိအပူၤ, ဒီးမၤအါထီၣ်အ၀ဲသ့ၣ်လါလဲန့ၣ်လီၤ.

ဒ်လၢညါအလုၢ်လၢ်အိၣ်၀ဲအသိး, ကၠိသရၣ်စးထီၣ်သိၣ်လိတၢ်လၢတီၤဖုၣ် ပတီၢ်, ဒီးဖဲအ၀ဲသ့ၣ်အတၢ်လဲၤခီဖျိအါထီၣ်
တၢ်သုးထီထီၣ်အပတီၢ်ဆူ တီၤခၢၣ်သး ၀ံၤဆူတီၤထီပတီၢ်န့ၣ်လီၤ. ကျဲတဘိလၢလါလဲအါထီၣ်သ့ မ့ၢ် ကၠိသရၣ်အပတီၢ်
ကဘၣ်ထီထီၣ်န့ၣ်လီၤ. လၢတၢ်အံၤအဃိ, ကၠိသ ရၣ်လၢအသိၣ်လိဖိသၣ်ဆံးဖိတဖၣ် မ့ၢ်၀ဲကၠိသရၣ်သီသီ လၢအတၢ်
လဲၤခီ ဖျိအိၣ်စှၤကတၢၢ်န့ၣ်လီၤ.

ဘၣ်ဆၣ်လၢအခဲအံၤ, ဒ်သိးကဟ့ၣ်ဂံၢ်ဟ့ၣ်ဘါ တၢ်ကူၣ်ဘၣ်ကူၣ်သ့အ ကံၢ်အစီလၢ ဖိသၣ်တီၤဖုၣ်ပတီၢ်အဂီၢ်, တၢ်ကူၣ်
ဘၣ်ကူၣ်သ့ကိတိၤစံး၀ဲ, တီၤဖုၣ်ကၠိသရၣ်လၢ အသိၣ်လိတၢ်ဂ့ၤ ဒီးမၤန့ၢ်တၢ်လဲၤခီဖျိအါတဖၣ်, တၢ်ကသုးထီၣ်ထီအ၀ဲသ့ၣ်
ပတီၢ်ဆူ တီၤဖုၣ်ကၠိသရၣ်လၢ "သရၣ်လၢအသ့မူးနီၢ်" အပတီၢ် ၁ ဒီး ၂ န့ၣ်လီၤ. တၢ်ပာ်လီၤကၠိသရၣ်လၢအသ့မူးနီၢ်ပတီၢ်
တၢ်မၤအကျိၤအကျဲအံၤ တၢ်ကစူးကါ အီၤလၢ တီၤဖုၣ်, တီၤခၢၣ်သး, ဒီးတီၤထီကၠိပတီၢ် အဂ့ၢ်, အူခဲၤမၠၣ် လၢအမ့ၢ်ပှၤကတိၤ
တၢ်ပၢလၢ တၢ်ကူၣ်ဘၣ်ကူၣ်သ့ကိတိၤတဂၤ စံး၀ဲလီၤ.

အူခဲၤမၠၣ်စံး၀ဲ, "တဘျီဃီဖဲကၠိသရၣ်န့ၢ်ဘၣ် တၢ်သုးထီၣ်ထီအပတီၢ်, အ၀ဲသ့ၣ်အလါလဲ ကအါထီၣ်တစုဃီဖဲန့ၣ်လီၤ."

တၢ်ကူၣ်ဘၣ်ကူၣ်သ့ကိတိၤ ဆှၢနုာ်လံတၢ်ဃ့ထီၣ် ဆူတၢ်တိၤကျဲၤဒီး ကျိၣ်စ့ဂ့ၢ်၀ီကိတိၤ Ministry of Planning and
Finace ဒီး ဒီကလုာ်ပဒိၣ်၀ဲၤဒၢး National Government Office အအိၣ် လၢတၢ်ကမၤအါထီၣ်ကၠိသရၣ်လါလဲအဂီၢ်
န့ၣ်လံလီၤ.

"တုၤမ့ၢ်ပဒိးန့ၢ်ဘၣ်တၢ်စံးဆၢလၢ ဒီကလုာ်ပဒိၣ်၀ဲၤဒၢးတဘျီ, ပကမၤအါထီၣ်ကၠိသရၣ် လါလဲန့ၣ်လီၤ." အ၀ဲဒၣ်စံး.
"တၢ်ရဲၣ်တၢ် ကျဲၤအံၤ တၢ်ကဒုးအိၣ်ထီၣ်အသူအသၣ် ခဲကိာ်တနံၣ်သ့ၣ်သ့ၣ်လီၤ."

လၢအကတီၢ်အံၤ, တီၤဖုၣ်ကၠိသရၣ်လၢအစးထီၣ်သိၣ်လိတၢ်သီသီ န့ၢ်ဘၣ်၀ဲ ၁၅၅,၀၀၀ ကၠး, တီၤခၢၣ်သးကၠိသရၣ်
တၢ်ဟ့ၣ်အီၤစး ထီၣ် ၁၆၅,၀၀၀ ကၠး, ဒီး တီၤတီကၠိသရၣ် စးထီၣ်သီသီန့ၢ်ဘၣ်၀ဲ ၁၇၅,၀၀၀ ကၠးဃၣ်ဃၣ်လီၤ.