ကီၢ်ပဒိၣ်ကမၤဘၣ်ဂီၢ်က့ၤ ဂံၢ်ခီၣ်ထံးဆူၣ်ချ့တၢ်ကွၢ်ထွဲကလီ လၢပှၤဖှီၣ်ဖိယာ်ဖိအဂီၢ်, လၢထံကီၢ်တၢ်အိၣ်ဆူၣ်အိၣ်ချ့တၢ်ရဲၣ်တၢ် ကျဲၤအဖီလာ်, အဂ့ၢ်ခိၣ်နၢ်ဒိၣ်ထီတဂၤစံး၀ဲလီၤ.

ဆူၣ်ချ့ဒီးတၢ်လိၣ်ခိၣ်လိၣ်ကွဲကိတိာ်, မၤထွဲထီၣ်တၢ်ရဲၣ်တၢ်ကျဲၤ၀ဲအံၤ လၢအစးထီၣ်အသးမဟိတနံၣ် ဒီးကဆဲးလဲၤဒံးတုၤလၢ ၂၀၂၁ လီၤ.

ဒီးက်ထၢၣ်သဲၣ်စ့ၤထူ, လၢအမ့ၢ်တၢ်ရဲၣ်တၢ်ကျဲၤ ပှၤပၢဆှၢရဲၣ်ကျဲၤတၢ်တဂၤ, စံး၀ဲလၢပှၤဘၣ်မူဘၣ်ဒါတဖၣ် ကျဲးစၢးမၤလီၤတံၢ် ဆူၣ်ချ့တၢ်ကွၢ်ထွဲဖဲလဲၣ်တကလုာ် လၢတၢ်ဟ့ၣ်လီၤကလီသ့လၢပှၤဖှီၣ်ဖိယာ်ဖိအဂီၢ်န့ၣ်လဲၣ်လီၤ.

ဒ်သိးတၢ်ကမၤဂ့ၤထီၣ်ပဒိၣ်ဆူၣ် ချ့တၢ်ကွၢ်ထွဲအကျိၤအကွာ်အဂီၢ်, ပဒိၣ်ကဘၣ်ပာ်န့ၢ်အဆၢလၢတၢ်ကွၢ်ထွဲကလီအဂီၢ် မ့ၢ်လၢတၢ်ကွၢ်ထွဲဒ်န့ၣ်တဖၣ် တတူၢ်ယံာ်တူၢ် ထၢအဃိလီၤ. တၢ်မုၢ်လၢ်၀ဲလၢတၢ်ပာ်လီၤဆီ ဂံၢ်ခီၣ်ထံး ဆူၣ်ချ့တၢ်ကွၢ်ထွဲ ၁၅၀ ကလုာ် လၢတၢ်ကဟ့ၣ်လီၤကလီဖဲတၢ်ဆါဟံၣ်ဒီး ဆူၣ်ချ့၀ဲၤလီၢ် စးထီၣ် ၂၀၂၀, အဂ့ၢ်ဆူၣ်ချ့ဒီးတၢ်လိၣ်ခိၣ်လိၣ်ကွဲကိတိာ် တၢ်ပာ်ဖျါစံး၀ဲလီၤ.

တၢ်လိၣ်အိၣ်၀ဲလွံၢ်ခါ လၢတၢ်ကမၤလီၤတံၢ် ဆူၣ်ချ့တၢ်ကွၢ်ထွဲအတၢ်ဂ့ၤထီၣ်န့ၣ်လီၤ. မ့ၢ်၀ဲ ဆူၣ်ချ့တၢ်လိၣ်အတၢ်သူၣ်လီၤဆီလီၤ, ပှၤကညီဂံၢ်ထံးကံၢ်စီ, ကသံၣ်ကသီဒီး ကသံၣ်ပီးလီ, ဒီးစ့တၢ်ဆီၣ်ထွဲတဖၣ်လီၤ.

ဒ်တၢ်ရဲၣ်တၢ်ကျဲၤ တၢ်ကွၢ်စူၢ်ကယာ်တၢ်မၤထွဲတၢ်မၤ၀ဲၤဒ့ စံး၀ဲအသိး, အပူၤကွံာ်မဟိတနံၣ် တၢ်မၤဂ့ၤထီၣ်ဆူၣ်ချ့၀ဲၤလီၢ် ဒီးတၢ် ဟ့ၣ်ကသံၣ်ဒၢးအိၣ်၀ဲ ၈၀၀ ဖျၢၣ်လီၤ.