ကညီဒီကလုာ်စၢဖှိၣ်ကရၢစံး, အတၢ်ဟဲက့ၤကဒါဆူ တၢ်မုာ်တၢ်ခုၣ်တၢ်မၤကျဲ ဒိးသန့ၤထီၣ်သးလၢ ပဒိၣ်ဒီးကလုာ်ဒူၣ်ဖီၣ်စုက၀ဲၤ ကရၢမုၢ်ဆ့ၣ်မုၢ်ဂီၤအတၢ်ထံၣ်ဟဲထီၣ်အစၢအဖီခိၣ်လီၤ.

လၢအလံာ်ဘိးဘၣ်ရၤလီၤဖဲနွံကတၢၢ်အပူၤ, စံး၀ဲလၢအ၀ဲသ့ၣ်ကကွၢ် မုၢ်ဆ့ၣ်မုၢ်ဂီၤအတၢ်ထံၣ်လိာ် ကဘှါၡဲတၢ်ြတီမၤတံာ်တာ် လၢတၢ်မုာ်တၢ်ခုၣ်တၢ်မၤကျဲပူၤ ဒ်လဲၣ်အဂ့ၢ်လီၤ.

"ကဒိးသန့ၤထီၣ်သးလၢ ထံကီၢ်ခိၣ်နၢ်အဖီခိၣ်လီၤ." ပဒိၣ်စီၤတၤဒိၣ်မူ, ကညီဒီကလုာ်စၢဖှိၣ်ရၢ နဲၢ်ရွဲၣ်ခိၣ်ကျၢၢ် စံး၀ဲလီၤ.

ကညီဒီကလုာ်စၢဖှိၣ်ကရၢ ဆိကတီၢ်ကွံာ်အတၢ်နုာ်လီၤပၣ်ဃုာ်လၢ တၢ်မုာ်တၢ်ခုၣ်တၢ်မၤကျဲပူၤ ဖဲလါနိၣ်၀့ဘၢၣ် ၁၀, စံး၀ဲလၢ အ ၀ဲသ့ၣ်
ကဘၣ်ၡဲပၠး အကရၢဖိဘၣ်ဃး တၢ်လၢအမၤအသးဖဲတၢ်တဲသကိးအဆၢကတီၢ် ဖဲအပူၤကွံာ်ခံနံၣ်အဆၢကတီၢ်လီၤ.

တၢ်တဲသကိးကတာ်ထီအသးလၢတၢ်ဂ့ၢ်တဘျုးခါအဖီခိၣ်, လၢအပၣ်ဃုာ် ကီၢ်ပယီၤအသုးမုၢ်ဒိၣ် အတၢ်ကတိၤဆူၣ်လၢအဘျးစဲ
"တၢ်တဘၣ်ထုးဖးသးလၢကီၢ်စၢဖှိၣ်ဘၣ်" ဒီးကလုာ်ဒူၣ်ဖီၣ်စုက၀ဲၤကရူၢ် နီၢ်ကစၢ်တၢ်စံၣ်ညီၣ်ပၢလီၤသးအခွဲးယာ် ဒီးတၢ်ကွဲးပာ် လီၤကီၢ်စဲၣ်ဂံၢ်ခီၣ်
ထံးတၢ်ဘျၢသဲစးတဖၣ်လီၤ.

"တၢ်အကီဒိၣ်ကတၢၢ်လၢ ကီၢ်ဒီတဘ့ၣ်တၢ်ပတုာ်တၢ်ဒုးတၢ်ခးအတၢ်အၢၣ်လီၤပူၤမ့ၢ် တၢ်မၤန့ၢ်တၢ်ထဲသိးတုၤသိး ဒီးတၢ်သူၣ်ထီၣ် ဒံၣ်မိၣ်ကရ့ၣ်စံၣ်ဖဲ
ဒရဲၣ်ကီၢ်စၢဖှိၣ် လၢအိၣ်ဒီးနီၢ်ကစၢ်တၢ်ပၢလီၤသးအလၢအပှဲၤန့ၣ်လီၤ." အ၀ဲဒၣ်စံး.

ပဒိၣ်စီၤတၤဒိၣ်မူ စံးစ့ၢ်ကီး၀ဲလၢ တၢ်ကဘၣ်ဃုကျဲလၢ တၢ်ကမၤဂ့ၤထီၣ်တၢ်တဲသကိးထံရူၢ်ကီၢ်သဲး လၢတအိၣ်ဒီးတၢ်ပာ်လီၤဆိ တၢ်အိၣ်သးနီ
တမံၤဘၣ်လီၤ.

အ၀ဲဒၣ်သဆၣ်ထီၣ် ကီၢ်ပယီၤသုးမုၢ်ဒီး ကညီဒီကလုာ်စၢဖှိၣ်ကရၢခံဖုလၢာ်, လၢကဘှါၡဲအ၀ဲသ့ၣ်တၢ်ဘၣ်ဂံာ်ဂူာ် လၢတၢ်မုာ်တၢ် ခုၣ်အကျဲ ဒီး
ခီဖျိတၢ်တဲသကိးန့ၣ်လီၤ.

"ရၢၢ်ခၢၣ်ကမျၢၢ်တဖၣ် အခွဲးအယာ်ကဘၣ်အိၣ်လၢ ကဆၢတဲာ်အ၀ဲသ့ၣ်အဘူၣ်အတီၢ်လီၤ. တၢ်ဂ့ၢ်အရ့ဒိၣ်ကတၢၢ်မ့ၢ် နီၢ်ကစၢ်တၢ် စံၣ်ညီၣ်ပၢလီၤသးလီၤ.
တၢ်နုာ်လီၤမၤတံာ်တာ်သးလၢပှၤဂၤအတၢ်ဂ့ၢ်ပူၤ ကဘၣ်ပတုာ်လီၤ." အ၀ဲဒၣ်စံး.

အ၀ဲဒၣ်ကိးထီၣ်၀ဲလၢ ရၢၢ်ခၢၣ်ကမျၢၢ်ကဘၣ်ဃုကျဲအသီလၢ ကဂုာ်မၤန့ၢ်အ၀ဲသ့ၣ်အတၢ်မုၢ်လၢ်ကွၢ်စိ ဒီးအတၢ်မိၣ်န့ၢ်သးလီလီၤ.

"တဘျီတခီၣ် ပကဘၣ်ဒုးတၢ်ဒီးစုက၀ဲၤလီၤ, ဘၣ်ဆၣ် ကျဲထဲတဘိလၢတၢ်ကဃုတၢ်ဘှါၡဲအကျဲ မ့ၢ်၀ဲတၢ်တဲသကိးတၢ်ဂ့ၢ်ကီလၢ တၢ်မုာ်တၢ်ခုၣ်
အကျဲန့ၣ်လီၤ, အ၀ဲဒၣ်စံး.