ဖဲမုၢ်လ့ဧိၤအနံၤ,အီၣ်မ့လၢအမ့ၢ်ကိတိာ်ခိၣ်လၢကီၢ်ခိၣ်ဝဲၤဒၢးဒီးမ့ၢ်စ့ၢ်ကီးပှၤတီခိၣ်ရိာ်မဲတၢ်မုာ်တၢ်ခုၣ်အတၢ်တဲကျဲၤသကိးတၢ်ကတိၤလီၤတၢ်ဖဲဘျီၣ်ဒိၣ်ထးခီလၢတၢ်မၤဂၢၢ်ကျၢၤက့ၤဝဲဒၣ်ပဒိၣ်အတၢ်
အၢၣ်လီၤအီလီၤလၢကဂုာ်ကျဲးစၢးမၤန့ၢ်ကီၢ်ဒီတဘ့ၣ်တၢ်ပတုာ်တၢ်ခးအတၢ်အၢၣ်လီၤအီလီၤအဂီၢ်ဒီးပာ်ဖျါထီၣ်ဝဲအတၢ်နာ်လၢကဒိးန့ၢ်ဘၣ်ဝဲတၢ်အၢၣ်လီၤအံၤလၢအဆိအချ့န့ၣ်လီၤ.

“ပယီၤသုးမုၢ်ဒီးကလုာ်ဒူၣ်ဖီၣ်စုကဝဲၤကရူၢ်အဘၢၣ်စၢၤတၢ်ဒုးတၢ်ယာ်တနီၤနီၤဖဲကခၠ့ၣ်,ယိၤဒိၣ်ဒီးကညီကီၢ်စဲၣ်တဖၣ်အပူၤမ့ၢ်အိၣ်ထီၣ်ဝဲဘၣ်ဆၣ်တၢ်မုာ်တၢ်ခုၣ်အကျိၤအကျဲအံၤတက့ၤကဒါက့ၤဆူလီၢ်ခံဘၣ်အဂ့ၢ်,”အဝဲစံး ဘၣ်ပှၤကွဲးတၢ်ကစီၣ်ဖိဖဲဘျီၣ်ဒိၣ်တၢ်အိၣ်ဖှိၣ်အပူၤန့ၣ်လီၤ.

ဖဲလၢအပူၤကွံာ်နွံကတၢၢ်,ကီၢ်ခိၣ်သ့စ့ၣ်လဲၤဟးအိၣ်သကိးပဒိၣ်ပှၤဟ့ၣ်ကူၣ်ဟ့ၣ်ဖးတၢ်ဖဲကီၢ်ပယီၤတၢ်မုာ်တၢ်ခုၣ်ဝဲၤလီၢ်ခၢၣ်သး(MPC)ဖဲဝ့ၢ်တကူၣ်ဒ်သိးကဟ့ၣ်လီၤဝဲတၢ်ဆီၣ်ထွဲမၤစၢၤဒီးတၢ်နဲၣ်လီၤဘၣ်ဃး
တၢ်ဂုာ်ကျဲးစၢးမၤန့ၢ်ကီၢ်ဒီတဘ့ၣ်တၢ်ပတုာ်တၢ်ခးအဂီၢ်န့ၣ်လီၤ.

ဒ်လဲၣ်ဂ့ၤ,ကီၢ်ပဒိၣ်,သုးမုၢ်ဒီးကလုာ်ဒူၣ်ပၢၢ်ဆၢတၢ်ကရူၢ်တဖၣ်စးထီၣ်မၤကီၢ်ဒီတဘ့ၣ်တၢ်ပတုာ်တၢ်ခးသၢလါဝံၤအလီၢ်ခံအဝဲသ့ၣ်သးလီၤပလိာ်လၢကကွဲးပတြီာ်သကိးတၢ်ပတုာ်တၢ်ခးလံာ်ပတြီာ်တဘ့ၣ်ဃီန့ၣ်လီၤ.
ဘၣ်ဆၣ်ဒီးတၢ်အိၣ်သးတအိၣ်ဖျါဝဲရှဲရှဲလၢမ့ၢ်အဝဲသ့ၣ်တၢ်မၤအကျိၤအကျဲအံၤကဲထီၣ်လိၣ်ထီၣ်ဝဲစ့ၢ်ကီးဧါန့ၣ်လီၤ.

ပဒိၣ်ပပှၢ်တနီၤနီၤလၢအနုာ်လီၤပၣ်ဃုာ်ဖဲတၢ်မုာ်တၢ်ခုၣ်အတၢ်ရဲၣ်တၢ်ကျဲၤအံၤဟ့ၣ်ပလီၢ်ဝဲလၢတၢ်တၢၣ်ပီၣ်တဲကျဲၤသကိးတၢ်အံၤမ့ၢ်တအိၣ်ဒီးတၢ်လဲၤထီၣ်လဲၤထီလၢနွံလၢကဟဲတဖၣ်အတီၢ်
ပူၤအံၤန့ၣ်ဒီးတၢ်ဒိးန့ၢ်ဘၣ်ကီၢ်ဒီတဘ့ၣ်တၢ်ပတုာ်တၢ်ခးတချုးလၢ(၂၀၁၅)နံၣ်အံၤကဲထီၣ်အသးတသ့ဘၣ်ဒီးပှၤပၢၢ်ဆၢတၢ်တဖၣ်ဘၣ်သ့ၣ်သ့ၣ်ကဘၣ်ကွၢ်ဆၢၣ်မဲာ်ဝဲဒၣ်ဒီးသုးခိၣ်ကျၢၢ်အသီတဂၤလၢအ
ကီခဲဒိၣ်န့ၣ်လီၤ.

ဖဲလၢမုၢ်လ့ဧိၤအနံၤ,အီၣ်မ့ပာ်ဖျါထီၣ်ဝဲဒၣ်လၢပဒိၣ်နာ်ဝဲလၢတၢ်ကဒိးန့ၢ်ဘၣ်ဝဲကီၢ်ဒီတဘ့ၣ်တၢ်ပတုာ်တၢ်ခးဒီးကလုာ်ဒူၣ်ပၢၢ်ဆၢတၢ်ကရူၢ်(၁၆)ဖုအံၤလိၣ်ဒံးထဲဒၣ်စှၤကိာ်နွံ(မ့)စှၤကိာ်လါန့ၣ်လီၤ.“ကလုာ်ဒူၣ်ဖီၣ်စုကဝဲၤ
ကရူၢ်အတၢ်အိၣ်ဖှိၣ်ဖးဒိၣ်ဖဲလဲစၣ်ဖဲခဲကိာ်တနွံဝံၤအလီၢ်ခံ,ပကထံၣ်လိာ်အိၣ်ဖှိၣ်သကိးဒီးကလုာ်ဒူၣ်ခိၣ်နၢ်တဖၣ်ဖဲဝ့ၢ်တကူၣ်ဒီးကဆဲးလီၤစုမုၢ်ကျၢၢ်လၢကီၢ်ဒီတဘ့ၣ်တၢ်ပတုာ်တၢ်ခးဖဲလါစဲးပထ့ဘၢၣ်
အတီၢ်ပူၤအဂ့ၢ်,”အဝဲစံးဘၣ်ပှၤကွဲးတၢ်ကစီၣ်န့ၣ်လီၤ.