ကီၢ်ပယီၤပဒိၣ်ဒီးကရ့ၣ်နံၣ်ဒီကလုာ်တၢ်လဲၤထီၣ်လဲၤထီကရၢပာ်ဖှိၣ်ထီၣ်သကိးအသုးမုၢ်တဖၣ်ဒီးစးထီၣ်သူၣ်ထီၣ်ဘှီထီၣ်ဝဲသဝီတဖျၢၣ်ဒ်အမ့ၢ်တၢ် ကသူၣ်အါထီၣ်သဝီလၢတၢ်ဆီလီၤပာ်လီၤန့ၢ်က့ၤပှၤလီၢ်အိၣ်ကမှံ(တူၢ်ဘၣ်တၢ်ဒုးတၢ်ယာ်လၢအယံာ်အထၢဖဲကယါကီၢ်စဲၣ်)တဖၣ်အလီၢ်အိၣ်လီၢ်ဆိး
အဂီၢ်သဝီအဒိအတဲာ်တဖျၢၣ်အသိးန့ၣ်အဂ့ၢ်,ခၣ်တၣ်ရၣ်ဝတံၣ်တၢ်ကစီၣ်ပာ်ဖျါဝဲဒၣ်န့ၣ်လီၤ.

စ့တိာ်ပာ်လၢတၢ်တၢ်သူၣ်ထီၣ်သဝီဖဲဃိၣ်လိာ်ကျိကၢၢ်နံၤဖဲမုၢ်ထီၣ်တခီ(ဖဲလၢမဲၢ်လးယူကျိယွၤခီဖျိဝဲဃိၣ်လိာ်ကျိဖဲရှါတီကီၢ်ဆၣ်)အံၤဘၣ်တၢ်တူၢ်လိာ် ပာ်ဂၢၢ်ပာ်ကျၢၤအီၤဖဲလါမးရှး(၃၁)သီ၂၀၁၄နံၣ်န့ၣ်လီၤ.ဘၣ်ဆၣ်ဒီးတၢ်စးထီၣ်သူၣ်ထီၣ်ဘှီထီၣ်ဝဲသဝီအံၤဖဲလါစဲးပထ့ဘၢၣ်အတီၢ်ပူၤန့ၣ်လီၤ.

ခူၤဖြူရဲၣ်လၢအမ့ၢ်ခ့ၣ်အဲၣ်ဖံၣ်ဖံၣ်(KNPP)လွဲၢ်ကီၢ်တၢ်ဆဲးကျိးဝဲၤဒၢးမူဒါခိၣ်စံးဘၣ်ခၣ်တၣ်ရၣ်ဝတံၣ်တၢ်ကစီၣ်လၢ,“တၢ်သူၣ်ထီၣ်ဘှီထီၣ်သဝီအံၤ တၢ်တိာ်ပာ်လၢကဝံၤဝဲဖဲလါစဲးပထ့ဘၢၣ်အတီၢ်ပူၤဘၣ်ဆၣ်ခီဖျိလၢတၢ်ဂ့ၢ်ကီအိၣ်ဝဲဒၣ်ဒီးတၢ်ဝံစိာ်တီဆှၢတၢ်ပီးတၢ်လီသ့ၣ်တဖၣ်အဃိမၤယံာ်မၤနီၣ်
ဝဲတၢ်တိာ်ကျဲၤန့ၣ်လီၤ.”

တၢ်သူၣ်ထီၣ်ဘှီထီၣ်သဝီဒီးတၢ်ဆီလီၤပာ်လီၤက့ၤလီၢ်အိၣ်လီၢ်ဆိးအတၢ်ရဲၣ်တၢ်ကျဲၤအံၤဘၣ်တၢ်အၢၣ်လီၤတူၢ်လိာ်အီၤခီဖျိခ့ၣ်အဲၣ်ဖံၣ်ဖံၣ်ဒီးကီၢ်ပဒိၣ် တဖၣ်ဖဲလၢအဝဲသ့ၣ်မၤတၢ်အိၣ်ဖှိၣ်ဖဲလါနိၣ်ဝ့ဘၢၣ်၂၀၁၃နံၣ်အခါန့ၣ်လီၤ.တၢ်တိာ်ကျဲၤအဂၤတဖၣ်လၢအဘၣ်ဃးဒီးတၢ်ဒုးအိၣ်ထီၣ်န့ၢ်တၢ်ဖံးတၢ် မၤဒီးတၢ်လုၢ်အီၣ်သးသမူအဂၢၢ်အကျၢၤလၢပှၤလီၢ်အိၣ်ကမှံတဖၣ်အဂီၢ်အံၤမ့ၢ်စ့ၢ်ကီးတၢ်လၢတၢ်ကဘၣ်မၤဒိၣ်ထီၣ်လဲၢ်ထီၣ်အီၤန့ၣ်လီၤ.

ဘၣ်ဃးဒီးပှၤသဝီဖိအတၢ်ဘံၣ်တၢ်ဘၢတၢ်ဂ့ၢ်ကီတဖၣ်အဂီၢ်,ခူၤဖြူရဲၣ်စံးဝဲ,“ပထဲၣ်ရှဲကွံာ်ဟီၣ်လာ်မ့ၣ်ပိၢ်ဖဲဟံၣ်ဃီအတၢ်လီၢ်တၢ်ကျဲသ့ၣ်တဖၣ်အံၤ ဒီးဘူၣ်ဒိၣ်စၣ်(bulldozer)လံန့ၣ်လီၤ.ဘၣ်ဆၣ်ဒီးတၢ်ဆဲးလီၤစုမုၢ်ကျၢၢ်လၢကီၢ်ဒီတဘ့ၣ်တၢ်ပတုာ်တၢ်ခးအတၢ်အၢၣ်လီၤအီလီၤကအိၣ်ထီၣ်ဝဲဒၣ်ဧါ
န့ၣ်ပဟ့ၣ်တၢ်အုၣ်ကီၤတသ့ဝဲဘၣ်န့ၣ်လီၤ.”

ဒ်လၢကရ့ၣ်နံၣ်ဘၣ်ကီဘၣ်ခဲကမံးတံာ်အနီၣ်ဂံၢ်စရီပာ်ဖျါဝဲအသိး,ကရ့ၣ်နံၣ်ပှၤဘၣ်ကီဘၣ်ခဲဖိလၢအမ့ၢ်ပှၤလီၢ်အိၣ်ကမှံအိၣ်လၢအိၣ်ဆိးဝဲဖဲကီၢ်ပ
ယီၤအပူၤ,ဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢတဖၣ်အိၣ်ဝဲ(၁၅,၀၀၀)ဂၤန့ၣ်လီၤ.