ကီၢ်ပဒိၣ်ကအိးထီၣ် တၢ်ကွၢ်ထွဲပှၤသးပှၢ် တၢ်သိၣ်လိတလါအံၤ ဒ်သိးကဆီၣ်ထွဲ ထံဖိကီၢ်ဖိပှၤသးပှၢ် အတၢ်အိၣ်မုာ်ဆိးပၢၤအဂီၢ် ဒီးအိး
ထီၣ်တၢ်ခွဲးတၢ်ယာ်အါထီၣ် လၢတၢ်ကလဲၤမၤတၢ်လၢကီၢ်ချၢအဂီၢ်, အဂ့ၢ် ကီၢ်ပယီၤတၢ်အိၣ်ဆူၣ်အိၣ်ချ့ဒီး တၢ်လိၣ်ခိၣ်လိၣ် ကွဲကိတိာ်ခိၣ်, အူမၠံၣ်ထွ့ စံး၀ဲလီၤ.

တလါအံၤတၢ်သိၣ်လိ ကစးထီၣ်ဖဲမုၢ်လ့ၢ်ဧိၤနံၤ ဒီးအိၣ်ဒီးတၢ်ဆီၣ်ထွဲမၤစၢၤလၢ ကမျၢၢ်သဘျ့ကရၢလၢအမ့ၢ် Poster Guigo Service Co.
ဒီး Japanese Elderly Care Training School န့ၣ်လီၤ.

တၢ်လိၣ်ဘၣ် တၢ်ကွၢ်ထွဲပှၤသးပှၢ် အါမးလၢဟီၣ်ခိၣ်ဒီဘ့ၣ်လီၤ. တၢ်သိၣ်လိတူၢ်လိာ်န့ၢ်ဒၣ်ထဲပှၤ ၉၇ ဂၤ, လၢပှၤပတံထီၣ် ၁၀၀၀ ဂၤအကျါလီၤ.

အူသါအီၣ်စိ, လၢအမ့ၢ်ဘျီၣ်ဒိၣ်ခၢၣ်စးလၢ မ့လၣ်ကီၢ်ဆၣ်, ပကိကီၢ်ဒိၣ်အဂီၢ်, စံး၀ဲလၢပှၤသးစၢ်လၢ ဘၣ်တၢ်သိၣ်လိလၢကကွၢ်ထွဲ ပှၤသးပှၢ်တဖၣ်,
ဃုတၢ်မၤန့ၢ်ညီလၢကီၢ်ချၢလီၤ.

အ၀ဲဒၣ်စံးဒံး၀ဲလၢ သရၣ်မုၣ်ကွၢ်ပှၤဆါ ဒီးသရၣ်မုၣ်မၤစၢၤတၢ်တဖၣ် တၢ်လိၣ်ဘၣ်အါမးလၢ ကီၢ်ပယီၤဒီးလၢထံဘူးကီၢ်ဘူးတနီၤ လီၤ.

ဒ်သိးတၢ်ကမၤပှဲၤတၢ်လီၤဖျဲၣ်လီၤဟိအဂီၢ် တယံာ်ဘၣ်ကီၢ်ပဒိၣ်ကအိးထီၣ် သရၣ်မုၣ်ကွၢ်ပှၤဆါဖၠၣ်စိမိၤကၠိ လၢၡွ့ၣ်ဘိၣ်ကီၢ်ဆၣ် လၢစကဲကီၢ်ဒိၣ်,
မၠီမၠးကီၢ်ဆၣ်လၢအ့ယၣ်၀တံၣ်ကီၢ်ဒိၣ်, ဒီးဟါခါကီၢ်ဆၣ်လၢ ခၠီကီၢ်စဲၣ်လီၤ.

ကိတိာ်ဘၣ်ဃး ပှၤမၤတၢ်ဖိ, တၢ်နုာ်လီၤဟးထီၣ်ထံလီၢ်ကီၢ်ပူၤ ဒီးပှၤနီၣ်ဂံၢ်စရီ တၢ်ပၢဆှၢဒီကလုာ်တၢ်သ့တၢ်ဘၣ် ဒီးတၢ်အပတီၢ် ၀ဲၤကျိၤ ပၢဆှၢရဲၣ်ကျဲၤ၀ဲ
သရၣ်မုၣ်မၤစၢၤတၢ်တၢ်သိၣ်လိ, တၢ်ကွၢ်ထွဲပှၤသးပှၢ်တၢ်သိၣ်လိ ဒီးတၢ်ထုးထီၣ်ဟ့ၣ်လံာ်အုၣ်သးတဖၣ်, အဂ့ၢ် အူမၠ့ၣ်ထွ့, စံး၀ဲလီၤ.