၀့ၢ်တကူၣ် - တၢ်ကူၣ်ဘၣ်ကူၣ်သ့ကိတိာ် ဟ့ၣ်လီၤတၢ်ကလုၢ်လၢတၢ်ကထုးကွံာ် တၢ်မၤလိတခါလၢထံဖိကီၢ်ဖိတၢ်သိၣ်လိအလံာ် လၢတီၤဖုၣ်လံာ်
သိၣ်ညိၣ်ဒိၣ်အပူၤ လၢပဒိၣ်ကၠိဒီးနီၢ်သဘျ့ကၠိတဖၣ် လၢပှၤအါဂၤကဒူးကဒ့ၣ်၀ဲလၢအဂ့ၢ် မ့ၢ်လၢတၢ်ကွၢ်တလီၤ တၢ်လၢကလုာ် ဒီးတၢ်ဘူၣ်တၢ်ဘါ
အဖီခိၣ်အဃိန့ၣ်လီၤ.

ဖဲလါဒံၣ်စ့ဘၢၣ် ကမျၢၢ်ပှၤတ၀ၢကရူၢ်အါန့ၢ်ဒံး ၁၀၀ ကွဲးထီၣ်လံာ်ဆူကီၢ်ခိၣ်အူ၀့မၠ့ၣ် ဒီးကဒူးကဒ့ၣ်၀ဲလၢ ထံဖိကီၢ်ဖိတၢ်သိၣ်လိအလံာ်
လၢတၢ်သိၣ်လိလၢတီၤဖုၣ်ကၠိအပူၤ ပၣ်ဃုာ်လံာ်ကျိၤဖုၣ် လၢကွၢ်တလီၤတၢ်ဒ်အမ့ၢ်, "သွံၣ်ကျီၣ်ကျဲ မ့ၢ်တၢ်မၤကမၣ်လၢအ လီၤသးဟ့, ဒီးကလုာ်
ကဟါမၢ်ကွံာ်န့ၣ်လီၤ." လံာ်ကျိၤဖုၣ်ဒ်န့ၣ်အသိးတဖၣ် တၢ် သိၣ်လိတ့ၢ်လၢကၠိ စးထီၣ်လၢ ၂၀၁၀ အခီၣ်ထံး လံၤလံၤန့ၣ်လီၤ.

"တၢ်မၤလိတဖၣ်အံၤ ဖျါလၢအကျဲးစၢးသွီနုာ် တၢ်ကွၢ်တလီၤအလုၢ်အလၢ် လၢဖိသၣ် ဆံးလၢအတၢ်ကမၣ်တအိၣ် အတၢ်ဆိကမိၣ်အပူၤန့ၣ်လီၤ."
လံာ် ပူၤစံး၀ဲလီၤ.

လံာ်အံၤတၢ်ကွဲးဒိစ့ၢ်ကီးအီၤဆူ ထံကီၢ်ပှၤကူၣ်လိာ်တၢ်အ၀ဲၤဒၢး, တၢ်ကူၣ်ဘၣ်ကူၣ်သ့ ကိတိာ် ဒီးဘျီၣ်ဒိၣ်ပှၤပၢၤလီၢ်ဆ့ၣ်နီၤတဖၣ် လီၤ.

တၢ်ကလုၢ်လၢ တၢ်ကူၣ်ဘၣ်ကူၣ်သ့ကိတိာ်ဟ့ၣ်လီၤ၀ဲ လၢတၢ်ကဘၣ်ပတုာ်သိၣ်လိ တၢ်မၤလိအံၤ ဒီးတၢ်ကဘၣ်ထုးထီၣ်ကွံာ်လၢ လံာ်သိၣ်ညိၣ်ဒိၣ်အပူၤ,
ဘၣ်တၢ်ရၤလီၤ အီၤလၢ ပှၤဂ့ၢ်၀ီတၢ်ကစီၣ်သန့အပူၤ ဖဲတယံာ်ဒံးဘၣ်န့ၣ်လီၤ.

တၢ်ကူၣ်ဘၣ်ကူၣ်သ့ကိတိာ်ခိၣ် ခံဂၤတဂၤ အူ၀့မီၣ်ထိ တဲလီၤတံၢ်ဘၣ်ဃးတၢ်ဆၢတဲာ်အဂ့ၢ် ဆူအ့ယၣ်၀တံၣ်တၢ်ကစီၣ် ဖဲမုၢ်ယူာ် အနံၤန့ၣ်လီၤ.
အ၀ဲဒၣ်စံး၀ဲ, အ၀ဲသ့ၣ်ဆၢတဲာ်လၢ ကထုးကွံာ်၀ဲ, မ့ၢ်လၢအထီဒါဒီးကိတိာ်အဖီလစံၣ်လၢ တၢ်ကွၢ်တလီၤတအိၣ် ဘၣ်န့ၣ်လီၤ.

"ပစံးဘျုးဘၣ်တၢ်ကူၣ်ဘၣ်ကူၣ်သ့ကိတိာ် လၢတၢ်ဆၢတဲာ်အံၤအဂီၢ်လီၤ." ဒီၢ်ခဲၣ်သလ့သ့, လၢအမ့ၢ် အ့ၣ်ကၠ့မ့ၢ်ဟ့ၣ်ဒူၣ်ပိာ်မုၣ် ပှာ် ဘျးစဲကရၢ
အပှၤပၢၤလီၢ်ဆ့ၣ်နီၤ, လၢအဆဲးစုမုၢ်ကျၢၢ်လၢလံာ်ပူၤ, စံး၀ဲလီၤ.

ကိတိာ်အတၢ်ဆၢတဲာ် ဟဲ၀ဲဖဲတၢ်ထံၣ်လိာ်အိၣ်ဖှိၣ်ဒီးခၢၣ်စးလၢ ကမျၢၢ်ပှၤတ၀ၢကရၢ ဖဲအပူၤကွံာ်တလါ၀ံၤအလီၢ်ခံလီၤ.